Salta la barra di navigazione e vai ai contenuti
23 de cabudanni 2009
Cunsideradu ca in su programma amministrativu e de guvernu pro sa legisladura 2005-2010 de s’Amministratzione Comunale una de sas prioridades urgentes, prima de pentzare a nde fàghere àteras, fiat de si iare a ite fàghere pro cumpletare sas tantas istruturas pùblicas bisonzosas de acontzu, carchi traballu de manutentzione istraordinària at a permìtere, a intro de pagu tempus, de acontzare carchi impiantu isportivu importante de sos istitutos iscolàsticos superiores. Semus faeddande de sa palestra amuntada de s’Istitutu Professionale (acanta a cussa de s’iscola mèdia) e a sos campos a s’apertu de su Litzeu Iscientìficu. A pustis chi su Comune de Bilartzi at insistidu cun sas richiestas, sa Provìntzia de Aristanis at programmadu unas cantas operas pro pòdere torrare a usufruire de sos impiantos isportivos.
“Custos traballos, narat s’assessore comunale a s’Isport Francesco Miscali, prus de totu cussos pro sa palestra, fiant netzessàrios a beru pro pònnere in seguresa totu s’àrea pro resones igiènicas e de òrdine pùblicu, ma prus de totu pro torrare a tènnere usufruìbile s’impiantu isportivu chi at a pòdere èssere usadu non solu dae sos istudente ma fintzas dae carchi sotziedade isportiva locale."
Sa Provìntzia e su Comune sunt istados de acordu in su fatu chi oramai non fiat prus possìbile trantzire s’acontzu de unu impiantu cunsideradu cun disprasere una ispètzie de “terra de nessunu”, degolladu dae vàndalos (comente testimonzant in manera crara sas fotografias) e in ue acanta a sas Iscolas Mèdias si podiat fàghere a beru de totu.
“Essende cussizeri comunale de Bilartzi e assessore provintziale a s’Isport e Polìticas Giovaniles, affirmat Serafino Corrias, apo solletzitadu meda custu interventu de cumpletamentu e ristruturatzione chi at a cunsentire non solu a sos istudentes ma fintzas a carchi sotziedade locale de usufruire de s’istrutura” . Cun sos traballos apaltados a sa dita CIS Costruzioni de Santu Isperau e zai cunsegnados, at a èssere fatu a nou torra totu su panimentu de su campu cun materiales e colores modernos, ant a èssere fatas recintziones e cantzelladas, bonificadas sas tribunetas, fata un’apertura chi at a cullegare su campu a s’Ipsia, at a èssere torrada a fàghere s’iscala de s’essida de seguresa de sa palestra comunale e totu sa recintzione noa de s’istitutu. A s’Iscientìficu, est postu in contu de isciusciare sos campos esternos chi zai esistint e de nde fàghere tres noos traciados pro basket- pallavolo, tennis, calcetto.
